ភ្នំពេញ៖ រដ្ឋមន្ត្រីក្រសួងទេសចរ បានឲ្យដឹងថាចរន្តភ្ញៀវទេសចរក្នុងចុងសប្តាហ៍ទី១ នៃខែមេសាមានសន្ទុះកើនឡើងវិញបន្តិច បន្ទាប់ពីមានការថមថយអស់ជាង២សប្តាហ៍ចុងក្រោយ ដែលបណ្ដាលមកពីការជះឥទ្ធិពលនៃការកើនឡើងតំលៃប្រេងសាំង។
រដ្ឋមន្ត្រីក្រសួងទេសចរណ៍ លោក ថោង ខុន បានឲ្យដឹងនៅថ្ងៃទី៤ ខែមេសា ឆ្នាំ២០២២នេះថា នៅចុងសប្ដាហ៍ទី១ ខែមេសា កម្ពុជាទទួលបានភ្ញៀវទេសចរចំនួន ២១២ ៨៣៦នាក់ ក្នុងនោះភ្ញៀវជាតិ ១៩៩ ១១៣នាក់ និងភ្ញៀវបរទេសផ្ទៃក្នុង ១៣ ៧២៣នាក់។
គោលដៅទេសចរណ៍សំខាន់ៗ រួមមាន ខេត្តព្រះសីហនុ ៣១ ៧២៣នាក់ រាជធានីភ្នំពេញ ២៧ ៨៥០នាក់ ខេត្តកំពត ២៥ ៥៦៤នាក់ ខេត្តបាត់ដំបង ២៣ ២១៧នាក់ ខេត្តសៀមរាប ២១ ៦១៥នាក់ ខេត្តកែប ១៦ ៣៨២ នាក់ និងខេត្តពោធិ៍សាត់ ១២ ៩៦៨នាក់។
លោកបន្តថា តួលេខខាងលើមានការកើនឡើងប្រមាណ ៣,១% ធៀបនឹងចុងសប្តាហ៍កន្លងមក។ ជាពិសេសនៅថ្ងៃអាទិត្យចុងសប្ដាហ៍នេះ មានប្រជាពលរដ្ឋដែលជាប់ខ្សែស្រឡាយចិន បានចេញធ្វើដំណើរទៅស្រុកកំណើត ដើម្បីធ្វើពិធីសែនឆេងម៉េងផងដែរ៕
